Ватăсене - çирĕп сывлăх

Категория: Публикации Опубликовано: 2020-02-14 10:54:59 Версия для печати
Дом престарелых.JPG
"Ырă кăмăл - пурин валли те" проект ЧР Цифра аталанăвĕпе информаци политикин тата массăллă коммуникацисен министерстви пулăшнипе пурнăçланать.

"Шăмăршăри халăхăн социаллă пулăшупа тивĕçтерекен центр" (ЦСОН) халăх хушшинче Ваттисен çурчĕ ятпа çỹрет.

Пĕчченлĕхре юлнă 26 çын ватлăхра хỹтлĕх тупнă кунта. Çак икĕ хутлă хăтлă çурт вĕсемшĕн чăн-чăн тăван кил пулса тăнă: кашнийĕн хăйĕн вырăнĕ, канмалли пỹлĕмсем, çап-çутă пысăк столовăй _ пур çĕрте те таса, тирпейлĕ. Кунта ĕçлекен специалистсем те пурте питĕ кăмăллă _ кашни ватă çынна тимлĕх уйăраççĕ, вĕсен йывăр кун-çулне çăмăллатма тăрăшаççĕ. Çулла çак çуртăн йĕри-таврашĕ чечек ăшне путать. Лайăх çанталăкра кинемисем сак çине тухса хĕвел питтинче лараççĕ, çамрăк çулĕсене аса илеççĕ. Ура тĕрекĕ пуррисем вара уçă сывлăшра уçăлса çỹреççĕ, илемлĕ тавралăхпа киленеççĕ.

Асăннă центрта ĕçлекенсем ваттисен çуртĕнче кил ăшши тупнисене кăна мар, районта пурăнакан пенсионерсене те тимлĕх çитереççĕ. Акă Ирина Николаевна Антонова, социаллă ĕç специалисчĕ, "Демографи" наци проекчĕн "Аслă ăру" программипе тивĕçнĕ "Лада Ларгус Куб" нумай вырăнлă вĕр-çĕнĕ автомашинăпа районти ялсене час-часах тухса çỹрет, 65 çултан аслăрах пенсионерсене сывлăхне тĕрĕслеттерме районти тĕп больницăна илсе килет. _

Хăçантанпа сирĕн çакăн пек чаплă машина? _ тĕлĕнсе ыйтатăп Ирина Николаевнăран.

_ Çак хăтлă машина Шăмăрша 2019 çул вĕçĕнче çитрĕ, _ каласа парать вăл. _ Çав тери меллĕ ватăсене унта ларса çỹреме: çемçе ларкăчсем, машинăна кĕмелли пускăчне (подножка) антарма та, хăпартма та пулать. Коляскăллă инвалидсемшĕн те салона кĕрсе вырнаçма чăрмав çук. Шалта сывлăша уçăлтармашкăн кондиционер пур, водительпе васкавлă çыхăнмалли кнопка тата ытти те.

_ Ватăсене мĕнле тĕллевпе илсе килетĕр-ха район больницине? Унта кун ирттерме йывăр мар-и çулĕсемпе чылай аслă пенсионерсене? _ малалла тĕпчетĕп уçă кăмăллă тарават хĕрарăма.

_ Çак ĕçе ялти ФАПсемпе (фельдшерпа акушер пункчĕсемпе), район больницин тухтăрĕсемпе тачă çыхăнура йĕркелесе пыратпăр. Ватăсен списокне ялти фельдшерсем çирĕплетеççĕ, районти тĕп больницăра вара вĕсене Е.Чихина врачпа регистратура ĕçченĕсем кĕтсе илеççĕ, вĕсемех кирлĕ кабинетсем тăрăх черетсĕрех илсе çỹреççĕ. Диспансеризаци тухаççĕ больницăра аслă ăру çыннисем, хăшĕ пĕр-пĕр тухтăр патĕнче сывлăхне тĕплĕнрех тĕрĕслеттерет. Анчах та пĕтĕм тĕрĕслев тĕрлĕ кабинетсенче пулнă хыççăн та пурĕ те 2-2,5 сехет çеç йышăнать иккен _ ватăсем ывăнса ĕлкĕреймеççĕ çак хушăра. Больницăран тухсан юнашарти аптекăран эмелсем туянма та пултараççĕ. Унтан каллех _ хăтлă машинăна. Килнех çитерсе хăваратпăр.

_ Мĕнле ялсенчен илсе килтĕр тĕрĕслеве çак кĕске вăхăтра?

_ Çак ĕçе эпир Патирекре пурăнакан 65 çултан аслăрах пенсионерсенчен тытăнтăмăр, вĕсене декабрь уйăхĕнче район больницине çитертĕмĕр. Пĕлесчĕ сирĕн, епле савăнчĕç вĕсем çак çĕнĕлĕхсемшĕн! Питĕ çăмăллăн та хăвăрт диспансеризаци тухнăшăн Н.Шайметова, З.Лебедева, Т.Мандрюкова тата ыттисем те пире тав сăмахĕ каласа пĕтереймеççĕ...

Çапла майпа правительство ватăсен сывлăхне тĕрĕслесе тăма пулăшать, вăхăтра чир-чир тупса сывалма май парать. Декабрь-январь уйăхĕсенче "Аслă ăру" программăпа килĕшỹллĕн Патирек, Анат Чаткас, Тури Чаткас, Васан, Пуянкасси, Карапай Шăмăршă ялĕсенче пурăнакан 44 пенсионера диспансеризаци витĕр кăларнă, чир-чĕре вăхăтра палăртса шала кайма паман. И. Антонова пĕлтернĕ тăрăх, февраль уйăхĕнче _ Пăчăрлă Пашьел, Чукал, Кивĕ Чукал, Улмаллă тата ытти пĕчĕк ялсенчи ватăсен сывлăхне Шăмăршăри тĕп больницăра тĕрĕслеттересси. Нумай-нумай çул пурăнччăрах тивĕçлĕ канури ватăсем, хăйсен пуян пурнăç опычĕпе çамрăксемшĕн тĕслĕх пулса тăччăрах! Вĕсем хăйсен ĕçченлĕхĕпе тата яваплăхĕпе пиртен тимлĕх курма тивĕçлĕ.

Кăларăма Галина Иванова хатĕрленĕ.
При использовании материалов ссылка на данный сайт обязательна © 2020

Телефон: 8 (83546) 2-33-51

Факс: 8 (83546) 2-33-50

429170, Россия, Чувашская республика, Шемуршинский район

с.Шемурша, ул. Ленина, д.22

Email: shemur@press.cap.ru