Çурт-йĕр çĕклесси - хисеплĕ ĕç

Категория: Публикации Опубликовано: 2019-08-09 08:27:57 Версия для печати
IMG_2602.JPG
ПИРĔН çĕршывра Строитель кунне кăçалхипе 64-мĕш хут паллă тăваççĕ. Август уйăхĕн кашни 2-мĕш вырсарникунĕ - пурăнмалли çурт-йĕр, хуçалăх объекчĕсене тăвакансен професси уявĕ. Кăçал вăл августăн 11-мĕшĕнче килет.

Строительсен ăсталăхĕпе ĕçченлĕхĕ тата ĕçри яваплăхĕ ырă ята тивĕç. Вĕсен аллипе пирĕн районта мĕн чухлĕ çурт-йĕр, промышленноç объекчĕсем, вĕренỹ тата культура учрежденийĕсем хута кайнă!

Строитель тесен эпир чăн малтан каменщиксемпе бетонщиксене, штукатурсемпе плиточниксене, малярсене куç умне кăларатпăр. Тин хăпартнă çурт çине пăхсан крановщикăн ĕçне асăрхамастпăр та. Тĕрĕссипе вара çурт тăвасси çак специалистран пуçланать те. Унăн ăсталăхĕ, правурлăхĕ, яваплăхĕ стройкăра пысăк пĕлтерĕшлĕ.

Ман умра Шăмăршăри «Строитель плюс» тулли мар яваплă организацин крановщикне Радий Локтина «Чăваш Республикин тава тивĕçлĕ строителĕ» хисеплĕ ят пани çинчен пĕлтерекен документ. Ăна Чăваш Ен Пуçлăхĕ кăçалхи январĕн 29-мĕшĕнче алă пусса çирĕплетнĕ.

Мĕнле çитĕнỹсемшĕн тивĕçнĕ-ха Радий Анатольевич çак хисепе?

«Строитель плюс» пĕрлешĕвĕн директорĕ Н.Быков çапла хуравларĕ ман ыйту çине:

- Пуçарулăхĕшĕн, хуть мĕнле ĕçе те тăрăшса, тĕплĕ пурнăçланăшăн. Кранпа ĕçлеме кашниех пултараймасть - тавçăруллă, ăста алăллă специалиста коллективра чăннипех хисеплеççĕ. Темле кăткăс условисенче те пысăк пахалăхпа ĕçлет вăл, хăйĕн тивĕçне каламасăрах пĕлет, задание чун-чĕрипе тăрăшса пурнăçлать.

Р.Локтин Хайпăла ялĕнче 1977 çулта çуралнă, Палтиелĕнчи вăтам шкулта ăс пухнă. Вăтам шкул хыççăн Канашри ДОСААФ шкулĕнче вĕренсе водитель правине илсен çуркуннехи призывпа çар ретне тăнă. Унта та 2 çул хушши техникăпа ĕçлесе служба ирттернĕ.

Çар служби хыççăн, 1997 çулта, «Шемуршинская» МСОра водителе ĕçе вырнаçнă. Техникăпа ĕçлес ăсталăхне курса, часах ăна крановщика вĕренме сĕнеççĕ. Çапла вăл строитель пулса тăрать те. Çак тытăмра паян кунчченех 22 çул тăрăшать вăл. Николай Никонович пĕлтернĕ тăрăх, çак хушăра вăл нихăçан та хăйне шанса панă ĕçе ỹрĕк-сỹрĕк пурнăçлани пулман. Яланхи пекех яваплăхĕпе тата пултарулăхĕпе кăна палăрса тăрать. Никĕс хума блоксем çĕклет е çỹлти хута кирпĕчсем хăпартать - кранĕ пĕр кăлтăксăр ĕçлет, ĕç тухăçлăхĕпе калăпăшĕ планпа пăхнинчен те ытларах пулса пырать. Строительствăра кашни специалист пысăк пĕлтерĕшлĕ!

Хальхи вăхăтра Р.Локтин «Строитель плюс» пĕрлешĕвĕн бригадипе пĕрле Палтиел ялĕнчи урамсене вак чул сарнă çĕрте вăй хурать, хăйне шанса панă кранпа тĕрлĕ ĕçсем пурнăçлать.

Радик çемье çавăрса тăван ялĕнчех тымар янă - мăшăрĕпе икĕ ача çитĕнтереççĕ. Картиш тулли выльăх-чĕрлĕх усрама та ỹркенмеççĕ - 3 сăвăнакан ĕне, пăрусем, хур-кăвакал... Мĕн чухлĕ выльăх çими хатĕрлемелле вĕсем валли çу каçипе? Пурне те ĕлкĕрет ял çынни, пĕр канăçсăр çемйишĕн тăрăшать.

Мĕн пур строителе професси уявĕ ячĕпе тăрăшуллă ĕçшĕн, çỹллĕ шайри ăсталăхшăн, суйласа илнĕ ĕçе чунтан парăннăшăн саламласа çирĕп сывлăх, пурнăçра ăнăçу сунатпăр!

Г.ИВАНОВА.
При использовании материалов ссылка на данный сайт обязательна © 2019

Телефон: 8 (83546) 2-33-51

Факс: 8 (83546) 2-33-50

429170, Россия, Чувашская республика, Шемуршинский район

с.Шемурша, ул. Ленина, д.22

Email: shemur@press.cap.ru